72
. . - - / . . - - /. . - - /. . -
Hûblar bûselerin gerçi revân eylediler
Yine bir bûseye bin minnet-i cân eylediler
Dil metâ’ın degerin degmeze biz hod satduk
Aldılar anı güzeller ne ziyân eylediler
Şöyle ‘ahd itmiş idük dahı güzel sevmeyevüz
Nâzenînler ne içün bizi yalan eylediler
Sîne sandûkasına atmağıçün dil-berler
Kaddümi cevr okına yine kemân eylediler
Senün aduna Revânî ne gazel kim yazdı
İsm-i a’zam gibi hep vird-i zebân eylediler
 
Ziya Avşar, REVÂNÎ DÎVÂNI, KÜLTÜR VE TURİZM BAKANLIĞI YAYIMLARI ,ISBN 978-975-17-3352-8