Her kim yanınca bir sanem-i meh-likâsı var
Her yirde ‘îş u ‘işret iderse revâsı var
2. Dildâr derdmendine hâcet degül tabîb
Ölmekden özge ol marazun ne devâsı var
3. Nazüklik ile bûse alur leb-be-leb olup
Câm-ı meyün güzeller ile hoş safâsı var
4. Niçün kesildi bu ser-i zülfün didüm didi
Dîn ehlinün diyâr-ı Firenge gazâsı var
5. Hıfz itmek içün ol sanemün hüsni gencini
Sagında vü solında iki ejdehâsı var
6. Bir pâdişeh bulıman anun gibi ben garîb
Anun kapuda bencileyin bin gedâsı var
7. Sögdükçe Hamdî gönlini şîrîn lebi alur
Şîrînlige ne turfa mücerreb du’âsı var
Ali Emre Özyıldırım, Hamdullah Hamdi Divanı, https://ekitap.kulturturizm.gov.tr/dosya/1-213627/h/giris.pdf
