ÜÇ DEFA SADR-I AZAM OLAN VEZÎR-İ ÂSAF-NAZÎR HEKÎM PAŞA-ZÂDE ALİ PAŞA HAZRETLERİNE SADÂRET-İ SÂLİSELERİNDE BU DAHİ NEFÎ-İ MERHÛMA NAZÎRE OLMAK ÜZERE VERİLEN KASÎDE-
İ NAZÎDEDİR
(Mefûlü Fâilâtü Mefâîlü Fâilün)
1 Güller ne dem ki revnak-ı bâg-ı cihân olur
Âlem o demde râh-rev-i gülsitân olur
2 Bülbüllerin figânı güle nâ-becâ mıdır
Bir gül yanaklı âfet içün terk-i cân olur
3 Kat kat kumâş-ı berg-i gül olunca âşikâr
Nakd-i sirişk-i bülbül o dem der-miyân olur
4 Ser-mestî-i hezâra mey-i reng ü bûy ile
Her bir nihâl sâkî-i sâgar-keşân olur
……..
10 Uşşâk-ı zâr giryede ol şûh handede
Bülbül figân u nâlede gül şâd-mân olur
11 Tîgin miyâna bend edicek serv-i kâmetim
Cisr-i sırât rûz-ı kıyâmet ayân olur
12 Seyr et habâbı bahre girince o sîm-ten
Fânûs-ı şem-i şule-ver-i hüsn ü ân olur
13 Bakmaz nigâh-ı lutf ile bir kerre hâlime
Korkar hilâf-ı kâide-i dilberân olur
14 Bir gün dedim ki ana eyâ şûh-ı şîve-kâr
Nâm u nişânım arayasın bir zamân olur
15 Ey serv-i ser-firâz-ı melâhat bu perçemin
Düşse hayâli bir dile sünbülsitân olur
16 Haşmet tolaşma perçemine kîl ü kâli ko
Cârûb-ı bâb-ı âsaf-ı çerh-âsitân olur
17 O zât-ı bî-adîl-i melâ’ik-sıfât kim
Hâşâk-rûb-ı pîş-i deri gîsuvân olur
18 Düstûr-ı kâmrân u melek-hûy-ı ins ü cân
Vasf-ı güzîni nâtıka-zîb-i cihân olur
………
30 Ser-medd-i hattı şâhid-i manâya ebruvân
Kilki zebân u hokka-i lali dehân olur
31 Bir şemmesi girerse ele bûy-ı hulkunun
Mülk-i Hıtâ’ya minnet ile armagân olur
32 Feyz-i nesîm-i hulku ne dem erse gülşene
Berg-i hazân-dîde gül-i ergavân olur
33 Hûrşîd-i hıfzı zerrece bâga verirse fer
Tâb-ı bahâr âfet-i bâd-ı hazân olur
34 Ey âsaf-ı zamâne ki nutk-ı inâyetin
Cism-i zaîf-i haste-i hırmâna cân olur
35 Kudsî-meniş firişte-siriştsin ki pertevin
Meşal-fürûz-ı şâh-reh-i kudsiyân olur
36 Sen bir atâ-yı Hazret-i Hak’sın bu devlete
Her hıdmetin kabûl-i şeh-i nükte-dân olur
……….
44 Bir bir yazıp mekârimini Haşmetâ kulun
Evsâfın ile levha-tırâz-ı beyân olur
45 Lâkin bu iktidâr-ı sühan terbiyenledir
Ger iltifâtın olmasa hâlim yaman olur
46 Bir şâir eyledin ki beni haşre dek cihân
Bî-câ kelâmıma dahi sâbâş-hân olur
47 Öyle sühan-verâna becâdır inâyetin
Şâir gürûhu bâis-i şân-ı şehân olur
48 Unvân-ı devlet oldugu eşârın âşikâr
Şâir kelâmı gûş-zed-i düşmenân olur
49 Çok devletinde muciz-eser mâhir-i sühan
Ammâ yanımda her birisi bî-zebân olur
50 Hakkâ benim o şâir-i muciz-edâ-yı Rûm
Her bir lisâna nutk-ı dilim tercemân olur
…………
61 Tavr-ı sühanda Nefî gibi cümleye salâ
Gelsin benimle var ise bir imtihân olur
62 Hîn-i tekellümümde tekellüfden ârîyim
Nutkumda rûh gibi letâfet ayân olur
63 Bu iftihâr zât-ı güzîninledir senin
Kim vasf-ı zât-ı nükte-verin bana şân olur
64 Haşmet ko lafı vakt-i duâ geldi kim duâ
Nazm âhirinde vird-i dil-i şâirân olur
65 Tâ kim nesîm-i feyz-i sehergâh-ı rûzgâr
Gonce-küşâ-yı gülşen-i kevn ü mekân olur
66 Rûy-ı hazânı görmeye ol nahl-i devleti
Tâ ol zamân ki bâg-ı cihân pür-hazân olur
Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ
