[mefâ’îlün mefâ’îlün mefâ’îlün mefâ’îlün]
1 Hat-ı la’li ki Hızruŋ çeşmesârı anda müdgamdur
Müşâbihdür du’â-yı nûra yâhud ismi-i a’zamdur
2 Nazar kıl çeşm-i ‘ibretle çemende lâle vü nergis
Biri tâc-ı Keyânîdür birisi efser-i Cemdür
3 Bütün dünyâ deger görmek yüzini yârumuŋ gerçi
Cihânda vaslına bir kerre irmek iki ‘âlemdür
4 Cihândan eyleyüp ‘uzlet olup ‘ışk ile hem-sohbet
Bugün Mecnûn gibi halvet mekânum vâdi-i gâmdur
5 Nazîrüŋ yok güneş yüzlüler içre ey hilâl-ebrû
Miyânuŋ kılca fehm olmaz dehânuŋ zerreden kemdür
6 Harîm-i Ka’be-i kûyuŋda kıblem Merve hakkıyçün
Lebüŋ şevkiyle akar eşk-i çeşmüm ‘ayn-ı Zemzemdür
7 Belâgat kişverin feth eyledüŋ tîg-i zebânuŋla
Yüri mülk-i fesâhat Rahmiyâ saŋa müsellemdür
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
