Hammâmiyye Der-Sitâyiş-i Vezîr-i a‘zam Dâmâd İbrâhîm Pâşâ
1. Sepîde-dem ki olup dîde hâbdan bîdâr
Hurûşa başladı nâ-gâh serde derd-i humâr
2. Hezâr za‘f ile hammâma doğru azm etdim
Kemer güsiste perâkende gûşe-i destâr
3. Varup o hâl ile hammâma üft ü hîz ederek
Edince gûşe-i halvetde câygâh-ı karâr
4. Ne gördüm âh amân el-aman bir âfet-i cân
Gelüp yanımda güneş gibi oldu şu‘le-nisâr
5. Saçı fütâdesinin hâbı gibi pejmürde
Nigâhı âşıkının hâtırı gibi efgâr
6. Vücûdu ham gümüşden beyâz gülden nerm
Boyu henüz yetişmiş nihâlden hem-vâr
7. Kamer hamîresi yâhud güneş mürebbâsı
Bilûr şâhı yâhud nahl-i lü'lü-i şehvâr
8. O kadd ü had o tenâsüb o gabgab ol pistân
O yâl ü bâl o temâyül o şîve-i reftâr
9. Tamâm reng ü bahâ mû-be-mû kirişme vü nâz
Tamâm hüsn ü ser-â-pây şu‘le-i dîdâr
10. Velîk hissolunur ki o nâz-perverdin
Derûnu içre bir endîşe vü bir âteş var
11. Ben ise derd ile kıldım figan ki âh aceb
Nedir eden dilin ol nâz-perverin bîzâr
12. Dedi o dem dil-i dîvâne her çi bâd-âbâd
Bu hâletin ederim andan aslın istifsâr
13. Cevâb-ı lutf verirse eger zihî devlet
Zihî sa'âdet eger kim ederse de âzâr
14. Heman hitâb edüp ey âftâb-ı nâz dedim
Ki ey fedâ o siyeh zülfe nâfe-i Tâtâr
15. Gümüşden âyîneler gibi saf iken sînen
45
Sezâ mıdır ki ola böyle pây-mâl-ı gubâr
16. Cihânı etmiş iken hayretin zebun ya seni
Kim etdi böyle ser-endâz-ı hayret ü efkâr
17. Nedir aceb sebeb-i hayretin nedir derdin
Kemâl-i lutfun ile kıl kemînene ihbâr
18. İşitdi çünki sözüm ol gül-i hadîka-i nâz
Derûn-ı sîneden âh eyleyüp çü bülbül-i zâr
19. Dedi ki âh su'âl etme derd-i pinhânım
Dil-i figârıma zahm urma sen de diger-bâr
20. Dilimle uğradığım kayda ben bu âlemde
Ne bülbül uğradı ne tûti-i şeker-güftâr
21. Karârın aldı dilin bir garîb dağdağa kim
İlâcı güç gamı müşkil tegâfüli düşvâr
22. Bu şeb bir âfetin ibrâmı ile meclisde
Çekilmiş idi bir iki piyâle-i ser-şâr
23. Tamâm neş'eler etdikde mihr gibi tulû‘
Miyân-ı meclise nakl oldu sohbet-i eş‘âr
24. Nedîm nâmına bir şa‘ir-i cihan var imiş
Kemend-i zülfüme düşsün ilahi ol ayyâr
25. Bir iki beytin onun keyfe ma't-tafak nâ-gâh
Bir ehl-i dil okuyup etdi bir dahı tekrâr
26. Şu rütbe etdi eser bana ol edâ-yı selîs
Ki tab‘-ı şûhum olup çâk-sâz-ı ceyb-i karâr
27. Yemin edüp kılıcım kabzasına nezr etdim
Bulup Nedîmi iki bûse eyleyim îsâr
28. Bu kerre şimdi belâ bunda hânesin bilmem
Ki azm edüp olam îfâ-yı nezre hâhişkâr
29. Tutalım arayarak bulmuşum onu ammâ
Kabûl kılmayup eylerse nezrim istihkâr
30. Hicâb mâni‘ olursa ya nâz ederse yahud
46
Ederse zühd satup sûret-i riyâ ızhâr
31. Nice çıkam acabâ uhdesinden ol nezrin
Kalır mı âh benim gerdenimde yohsa bu bâr
32. Kaçan ki bu sözü gûş etdi dil kalup bî-hûş
Kemâl-i hayret ile hem-çü sûret-i dîvâr
33. Dedim ki ey gül-i nev-hîz-i nâz ü işve sana
Fedâ Nedîm gibi bendeler hezâr hezâr
34. Ne gûne sihr idi âyâ o beyt-i pür-te'sîr
Ki bir senin gibi ser-keş perîyi etdi şikâr
35. Dedi ki bir iki beytü'l-kasîde kim olmuş
Onunla hazret-i sadr-ı güzîne midhatkâr
36. Cenâb-ı hazret-i düstûr-ı âsman-mesned
Ki mihr-i zâtına bir gerd bâliş-i zer-târ
37. Semiyy-i cedd-i resûl-ı Hudâ ki lutfundan
Cihanda âteş-i endûh u gam olur gülzâr
38. Yegâne sıhr-ı güzîn-i halîfetü'l-islâm
Vezîr-i a‘zam u ekrem müşîr-i pâk-tebâr
39. Alîl-i mihnete cûd u sehâsı habb-ı zeheb
Marîz-i ye'se atâyâsı şerbet-i dînâr
40. Dokunsa çeşmi eger jeng-beste mir'âta
Yeşil çemen gibi neşv ü nemâ bulur jengâr
41. Harîta resmi gibi huşg u teng-sûretdir
Kef-i kerîmine nisbetle kulzüm-i zehhâr
42. Serâb lem‘ası veş nef‘den mu‘arrâdır
Nihâd-i pâkine nisbetle feyz-i ebr-i bahâr
43. Edeydi âteş-i kahrı bıhârı isti‘lâ
Fetîl ü revgan olurdu cezîrelerle bıhâr
44. Harem-serâyına Kâfûr-ı zer-kemer hâdim
Derinde Cengiz ü Kaplan nâme-ber tâtâr
45. Zihî o kuvvet-i bâzû ki Hind-i garbîden
47
Zemîne etse eger nîzesin halîde çü mâr
46. Çıkup o demde ser-i nîze Hind-i şarkîden
Ederdi sadme-i yelmânı pây-ı râyı figâr
47. Cihan-penâh hidîvâ keremverâ sadrâ
Eyâ vezîr-i felek-bârgâh-ı mihr-âsâr
48. Sen ol hidîv-i cihansın kim ahd-i lutfunda
Nigehbanlık eder âşiyân-ı bülbüle mâr
49. Sen ol yegâne-i devr-i zamânesin ki senin
Nazîrin olmadı meşhûd-ı dîde-i devvâr
50. Cihânı lutf u mürüvvetle kâm-rân etdin
Cihânda kim alasın ber-sebîl-i istimrâr
51. Bu hüsn-i hulkı ki etmiş Hudâ sana ihsân
Bu baht-ı tâli‘i k'etmiş felek sana îsâr
52. Mübeşşer ol ki senin izz ü devlet ü câhın
Olur ziyâde bülend ü medîd leyl ü nehâr
53. Budur delîl bu da‘vâya kim senin ancak
Budur murâd-ı şerîfin ki cümle ehl-i diyâr
54. Olup zamân-ı şerîfinde emn ü râhatda
Cihanda olmaya bir ferde zulm ile âzâr
55. Fe-lâ-cerem bu cihan içre çün mücerrebdir
Ki böyle şefkat ü rahmi olan sudûr-ı kibâr
56. Olup o mesned-i vâlâda çok zaman mümted
Eder makâm-ı refî‘inde devlet ile karâr
57. Bu bahs-i pâki debistân-ı fazl u dânişde
Bu sûret ile ki takrîr eder ulü'l-ebsâr
58. K'olur zamân-ı kalîl içre muzmahil elbet
Delâlet etdiği çün şerre necm-i gîsû-dâr
59. Delîli olduğı'çün hayr-ı âleme sâ‘î
Cihanda dâ'im olur âftâb-ı feyz-âsâr
60. Ale'l-husûs ki bu bende-i kerem-dîden
48
Bu çâkerin bu kemînen bu abd-ı zâr u nizâr
61. O denlü lutf u kerem gördü hezretinden kim
O lutfu görmedi ebr-i bahârdan gülzâr
62. Nedîm kendi kulun kendi müstmendindir
Unutma zerreni ey âftâb-ı feyz-âsâr
63. Himâyet et ki senin bir yanar çerâğındır
Ta‘arruz eylemesin rûzgâr-ı bed-kirdâr
64. Ol âftâb-ı mekârimsin âsafâ sen kim
Umûm-ı feyzin ile sîrdir kibâr u sıgâr
65. Cihanda sen gibi müşfik efendisi var iken
Yazık değil mi kala böyle bî-kes ü bî-kâr
66. Mukayyed olmaya bir kâr ile bu âlemde
Ede derûnunu sevdâ-yı hâm ile âzâr
67. Bu sözde lîk efendim kalem yalan söyler
Ben eyleyeyim onun bâri kizbini izhâr
68. Derin güşâde iken cümle ehl-i irfâna
Kalır mı bî-kes o pâkize-tab‘-ı sihr-âsâr
69. Egerçi hidmeti yok lîk ona yeter bu şeref
Ki ede hidmet-i rıkkıyetinde ömrü güzâr
70. Hemân efendisini eylesin Hudâ dâ'im
Kerem eder komaz ………
Prof.Dr. Muhsin Macit, NEDÎM DİVÂNI, KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3371
