Mefâ`îlün mefâ`îlün mefâ`îlün mefâ`îlün
 
1 Güzeller çok cihânda ey dil-i şeydâ kemâl ehli
 Benüm yâr-ı güzînüm hem cemâl ü hem celâl ehli
2 Görün mâhı ki bedr olmayıcak noksân-pezîr olmaz
 Muhassal cevr-i dehri çekmez illâ kim kemâl ehli
3 Düşelden câna `aşkun nola sûzım eksik olmazsa
 Olur germiyyet üzre dâ'imâ elbette mâl ehli
4 Mahabbet kâle gelmez neş'edür ey bülbül-i şeydâ
 Ne da`vâlar ideydi olmasa pervâne hâl ehli
5 Gerek öldür gerek dög zerrece Yahyâ niza` itmez
 Degüldür `âşık-ı bî-çâreler ceng ü cidâl ehli
 
 
Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147