36
- . - - / - . - - / - . - - / - . –
Günde yüz bin cân alur cânâneler gördün mi hîç
Âşinâlıkdan kaçar bîgâneler gördün mi hîç
Ey gönül bir nâz ile bin cân u dil sayd idici
Bir bölük şehlâ gözi mestâneler gördün mi hîç
Dil-rübâlar ‘ışkına bâzâr-ı gamda dem-be-dem
Hânümân terk idici dîvâneler gördün mi hîç
Bezm-i ‘ışk içinde şem’-i hüsne yüz bin şevk ile
Bâl ü perler yakıcı pervâneler gördün mi hîç
Ey Revânî ‘ışk meydânında ‘âşıklar gibi
Terk-i cân eyler yürür merdâneler gördün mi hîç
Ziya Avşar, REVÂNÎ DÎVÂNI, KÜLTÜR VE TURİZM BAKANLIĞI YAYIMLARI ,ISBN 978-975-17-3352-8
