[fâ’ilâtün fâ’ilâtün fâ’ilâtün fâ’ilün]
 
1 Günde yüz biŋ cân alur cânâneler gördüŋ mi hiç
Âşinâlıkdan kaçar bîgâneler gördüŋ mi hiç
 
2 Ey göŋül biŋ nâz ile biŋ cân dili sayd idici
Bir bölük şehlâ gözi mestâneler gördüŋ mi hiç
 
3 Dil-rübâlar ‘ışkına bâzâr-ı gamda dem-be-dem
Hân-mân terk idici dîvâneler gördüŋ mi hiç
 
4 Bezm-i hüsn içinde şem’-i hüsne yüz biŋ şevk ile
Bâl [u] perler yakıcı pervâneler gördüŋ mi hiç
 
5 Ey [ki] Rahmî ‘ışk meydânında ‘âşıklar gibi
Terk-i cân eyler yürür merdâneler gördüŋ mi hiç
 
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,