Fâ‘ilâtün Fâ‘ilâtün Fâ‘ilâtün Fâ‘ilün(1)
1. Gülşen-i kûyuñdan ayru bülbül-i zâr olmışam
İñlerem tâ subha dek derd ile bîmâr olmışam
2. Göreli cânâ cemâlüñ şem‘ini pervâne-veş
Bâl ü perden geçmişem küllî yakup nâr olmışam
3. Leylî-i zülfüñ takaldan boynuma zencîr-vâr
Şîşe-i nâmûsı çaldum yire bî-‘âr olmışam
4. Göreli bâzâr-ı ‘ışk içre metâ‘-ı vasluñı
Cân u dil nakdin virüp aña harîdâr olmışam
5. İçeli rûz-ı ezel câm-ı mahabbet cür‘asın
Mest-i ‘ışkam tâ ebed sanma ki hüşyâr olmışam
6. ‘Akl u sabrı terk idüp dîvâne olsam tañ mıdur
Leylî-i zülfine anuñçün giriftâr olmışam
7 Çâre eyle çâre isterse ger Emrî çâresüz
Dil tabîbisin senüñ derdüñle nâ-çâr olmışam
Prof. Dr. Mehmet A. Yekta SARAÇ, EMRÎ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3144 KÜLTÜR ESERLERİ 427
