fâ’ilâtün fâ’ilâtün fâ’ilâtün fâ’ilâtün
1 Güllerüñ zîbâlıgı var rûy-ı zîbâlar kadar
Bülbülüñ feryâdı var ‘uşşâk-ı rüsvâlar kadar
2 Bu bahâr ezhârı itdi ‘ayn-ı hüsn-i rûy-ı yâr
Mu’teberdür şimdi nergis çeşm-i şehlâlar kadar
3 Sâhil-i bahr-i letâfet oldı gûyâ bâglar
Cûş-ı şeb-nemden tarâvet buldı deryâlar kadar
4 Mezra’-ı âmâle ey ‘âşık nemâ virdi bu dem
Va’d-i kemmûn-ı ekâbir va’d-i ferdâlar kadar
5 Sebze-i sahrâ gedânuñ şimdi sebz ihrâmıdur
İdemez dünyâda zevk a’lâlar ednâlar kadar
6 Sıhhat-i üstâd ile Pertev fe-hamden sümme hamd
Gül gibi handân u şâdânem ki dünyâlar kadar
Dr. Ekrem Bektaş, MUVAKKİT-ZÂDE MUHAMMED PERTEV DÎVÂNI, Malatya-2007, https://ekitap.kulturturizm.gov.tr/Eklenti/10630,muvakkitzade-pertevpdf.pdf?0
