Gazel
 
[73]
 [mef’ûlü / fâ’ilâtü / mefâ’îlü / fâ’ilün]
 
 1 Gül-nâr-ı la’li cennet-i hüsnüñ kirâsıdır
 Cânın verirse ‘âşık aña diş kirâsıdır
 
 2 Telh-âbe-i sirişk ile âh-ı ‘alev-feşân
 ‘Uşşâk şehriniñ güzel âb u hevâsıdır
 
 3 Çeşm-âşinâ-yı peyk-i nesîm-i mahabbetiñ
 Kûyuñ gubârı bâd-ı hevâ tûtiyâsıdır
 
 4 Mînâda cilve gösterişi duhter-i reziñ
 Sırça sarây içindeki kızlar edâsıdır
 
 5 Bîgâne tarzdır bize nâz u mu’âmele
 Bilmem o şûh şimdi kimiñ âşinâsıdır
 
 6 Zâtında ihtiyâcı yok esvâb-ı zînete
 Esbâb-ı nâz u şîve boyunca libâsıdır
 
7 Muhkem ‘imâdı nahl-i berûmend-i devletiñ
 Ehl-i niyâz-ı sâ’id-i dest-i du’âsıdır
 
 8 Biz istinâd eylemişiz istikâmete
 Şeyhiñ beli tayandıgı çûb-ı ‘asâsıdır
 
 9 Vehbî sebeb fütâdegî-i pûte-i gama
 Kesb etdigim fünûn-ı hüner kîmyâsıdır
 
Yrd. Doç. Dr. Ahmet YENİKALE, SÜNBÜL-ZÂDE VEHBÎ DÎVÂNI, Kahramanmaraş 2012