Fâ`ilâtün fâ`ilâtün fâ`ilâtün fâ`ilün
1 Göz yaşında hâlet-i şeb-nem olaydı kâşki
Gonce-i dil gül gibi hurrem olaydı kâşki
2 Kangı bî-insâfdan kaldı ki kânûn-ı riyâ
Vaz`-ı âyîn eyleyen hep Cem olaydı kâşki
3 Her kaçan kûyına varırsam görinmez gizlenür
Vara vara ol perî âdem olaydı kâşki
4 Mihnet-i `aşkun safâsın ben ideydüm yalınuz
Halk-ı `âlem dâ'imâ bî-gam olaydı kâşki
5 Virdi Yahyâ mihnet-i eyyâm-ı `âlemden ferâg
Kim safâ itmezdi bir `âlem olaydı kâşki
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
