Mefâ`ilün fe`ilâtün mefâ`ilün fe`ilün
 
1 Görüp ruhun gül-i cennet gibi letâfetde
 Kızardı kaldı çemen gülleri hacâletde
2 O nahl-i gülşen-i hüsn ü bahâ `aceb benzer
 Nihâl-i Sidre vü Tûbâ'ya kadd ü kâmetde
3 Visâle va`de idüp son ucı ider mahrûm
 Cefâ ider bana ol bî-vefâ nihâyetde
4 Uyup sözine rakîbün benümle söyleşmez
 O serv-kâmet ile söyleşem kıyâmetde
5 Şehâ firâk ile Yahyâ kulun ölüp gitdi
 Hemîşe sen kalasın sıhhat u selâmetde
 
 
Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147