mefâ’îlün mefâ’îlün mefâ’îlün mefâ’îlün
1 Görinen nokta nokta sanma hâl-i ‘anberînümdür
Didi saf saf siyeh-pûşân-ı ceyş-i mülk-i Çînümdür
2 Ser-â-pâ sînemi sûrâh sûrâh eyleyen ney veş
Gamuñla lahza lahza âteş-i âh u enînümdür
3 Amân at nâvek-i müjgânuñı tek sîneme yer yer
Dil ü cân ey kemân-ebrû saña kat kat rehînümdür
4 Olup tîg-i nigâhuñdan cebînüm nîme nîme âh
Sanurlar şerha şerha yaralar çîn-i cebînümdür
5 Görince böyle nev-tarhı kopar âvâze-i hey hey
N’ola peh peh denilse Pertevâ rengîn zemînümdür
Dr. Ekrem Bektaş, MUVAKKİT-ZÂDE MUHAMMED PERTEV DÎVÂNI, Malatya-2007, https://ekitap.kulturturizm.gov.tr/Eklenti/10630,muvakkitzade-pertevpdf.pdf?0
