Mef‘ûlü/ Fâ‘ilâtü/ Mefâ‘îlü/ Fâ‘ilün
Gördüm düşümde kûyuñı bâg-ı İrem gibi
Cennet nasîb ola varup aña girem gibi
Bir niçe gündür iki gözüm segirür göñül
Hâk-i reh-i nigâra yüzümi sürem gibi
Hem-dem olalı itüñ ile göñlüm uludı
Dirlikler itdi Rüstem ü Dârâ vü Cem gibi
Fikr eyledi dehânuñı dil gitdi kendiden
Bildüm ki aña menzil-i âhir ‘adem gibi
Tutmış kitâb-ı hüsnini hatt-ı nev ol şehüñ
Ey Ravzî bende defter-i ‘ömri dürem gibi
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
