Mefâ`îlün mefâ`îlün mefâ`îlün mefâ`îlün
1 Gönül efkâr-ı pîç-â-pîç-i zülfünle zebûn oldı
Belâ bu en iyü tedbîri zencîr-i cünûn oldı
2 Ne kanlar yutdı gör ragbet bulınca nâfe-i miskîn
Saçun hep zâyi` itdi dahı şimdi bagrı hûn oldı
3 Ne sırr olsun bu kim bir nokta düşdi kilk-i kudretden
Ruh-ı hûbâna ziynet lâleye dâg-ı derûn oldı
4 Irişür Ka`be-i maksûda kalmaz râh-ı mihnetde
Ana kim pertev-i nûr-ı cemâlün reh-nümûn oldı
5 Bilenler fenn-i `aşkı bilmemekle fahr ider Yahyâ
`Aceb dîvânedür zu`mınca ol kim zü-fünûn oldı
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
