MefǾūlü FāǾilātü MefāǾįlü FāǾilün
1 Gerdūn açıtdı çeşmümi ķat ķat baśal gibi
ǾĀlem tamām çıķdı gözümden sebel gibi
2 İtdi cüdā felek beni bir ŧatlu yārdan
Yandırdı nār-ı firķate şemǾ-i Ǿasel gibi
3 Fecc-i Ǿamįk-i Ǿaşķda bār-ı felāketi
Yüklendi dil o deňlü ki çökdüm cemel gibi
4 Bir bį-emān göz aġrısına mübtelā olup
Oldum esįr-i žulmet-i vaĥşet züĥal gibi
5 Yıllıķ ümįdi ile uşaķlar hücūm idüp
Sevdāya śaldılar beni ŧūl-ı emel gibi
6 İtse hücūm leşker-i ġam melcāʿ mı yoķ
Arķam ķavį efendüme Ǿālį cebel gibi
7 RefǾ eyle ħākden ķuluňı ey şeh-i kerem
Üftāde ķoyma ŧut elümi ŧutma il gibi
8 Taĥrįr idince ħāme görüp sāde nažmumı
Ĥāmį bu Ǿarż-ı ĥāli didi mürtecil gibi
Diyarbakırlı Hâmî Ahmed Hayatı
KAYNAK: Dr. Kadri Hüsnü YILMAZ, DİYARBAKIRLI HÂMÎ AHMED DİVANI, Ankara 2017
