435-
Fâ`ilâtün Fâ`ilâtün Fâ`ilâtün Fâ`ilün
1 Gerçi kim biñ cân deger cânânumuñ bir bûsesi
Degmede degmez aña `uşşâkuñ ammâ degmesi
2 Rûy-ı zerdüm dir görenler hâk-i pây-ı yârda
Topraga bâd-ı hazân iletdi berg-i nergisi
3 Cân-ı bîmâr âteş-i gamdan olupdur sûhte
Oldı var ise hayâl-i hâlüñ anuñ noktası
4 Âşiyân-ı murg ile Mecnûn niçe fahr itmesün
Başına cem` oldı Leylâ kûyınuñ hâr u hası
5 Bir tabîbe derd-i `aşkuñ çâresin sordum didi
Ey Ziyâ’î `âkıbet teslîm-i cândur çâresi
Dr. Müberra GÜRGENDERELİ, MOSTARLI HASAN ZİYÂ’Î DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3195 KÜLTÜR ESERLERİ
