615
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Tâli‘üm kıldı beni bir meh-i tâbân delüsi
Devr ider kûyın olup mihr-i dırahşân delüsi
Sadef agzuñ beni dür dişlerüñe ‘âşık idüp
Eyledi fikr-i lebüñ la‘l-i Bedahşân delüsi
341
Gülşen-i ‘ışk u mahabbetde figân itse ne var
Oldı dil bülbüli bir gonce-i handân delüsi
Kerbelâ-yı gam-ı ‘ışkında soyınsam ne ‘aceb
Var Hüseyn’üñ baña beñzer niçe ‘uryân delüsi
Gûş idüp öldügümi la‘li firâkında dimiş
Terk-i cân itmez idi olmasa cânân delüsi
Ne ‘aceb kûy-ı harâbâta göñül meyl itse
Genc-i ‘ışk oldugıçün olur o vîrân delüsi
Uslanup şâh kaçarsa ne ‘aceb kûh-ı gama
Geldi gâlib ‘Acem’e milket-i ‘Osmân delüsi
Kendüñi görme gel ey murg-ı seher sencileyin
Sanma ol goncenüñ olmaya hezârân delüsi
Pây-mâl itmez idi cünd-i belâ ey Ravzî
Olmasaydum ben o ser-leşker-i hûbân delüsi
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
