Mefâ‘îlün/ Mefâ‘îlün/ Mefâ‘îlün/ Mefâ‘îlün
Görüp gam leşkerin etrâfumuzda sanma şâhânuz
Gedâ-yı kûy-ı ‘ışkuz biz ne Sâm u ne Nerîmân’uz
Eñ ednâmuz bizüm çarh-ı berîne ser-fürû kılmaz
Ki zîrâ âsitân-ı şâh-ı ‘âlî-şâna derbânuz
Bizi Kanber-sıfat hıdmetde görüp bende zann itme
‘Alî sultâna çâker ya‘ni heft iklîme sultânuz
Reh-i kûyuñda hâk olduk benüm devletlü sultânum
Ayaklar tozıyuz biz gerçi kuhl-ı çeşm-i a‘yânuz
Gam-ı câm-ı mey-i la‘l-i lebüñle kalduk ayakda
Ele al destümüz sâkî ki biz pâ-mâl-i devrânuz
Bize hergiz ne bâk ey dil gam-ı fakr u mezelletden
Bihamdillâh ma‘ârif gevher-i nâ-yâbına kânuz
‘Acebdür ‘âlemüñ hâli ki hîç bir kimse rahm itmez
Esîr-i bend-i küfr-i zülf-i yâr olmış müselmânuz
Gam-ı yagmâ-yı Tâtâr-ı müjeñdür olmaduk hâlî
Niçe yıldur benüm hânum Kırım-ı gamda biz hânuz
Niye iñlersin ey Ravzî nedür bu nâleler dirseñ
Delindi sînemüz ney gibi zîrâ ehl-i ‘irfânuz
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
