Gazâl-ı mihr-i felek dâğdârım oldu bu gün
Ki böyle sürmeli âhû şikârım oldu bu gün
Piyâle çekmeden evvel o çeşm-i mahmûrun
Nigâh-ı mesti ilâc-ı humârım oldu bu gün
Hırâm-ı nâz ile hoş hoş gelüp o meh-pâre
Telâfi-i elem-i intizârım oldu bu gün
Sabâdan evvel açup göğsün ohşadım zülfün
Benim de bir anacak rûzgârım oldu bu gün
Göründü sebz hat-ı nev-demîde-i ruh-ı yâr
Nedîm-i sebze-i bâğ-ı bahârım oldu bu gün
Prof. Dr Muhsin Macit, Nedim Divanı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ, KÜLTÜR ESERLERİ 511
