Kaside
Gamzen ne dem ki tîğ çekip hûn feşan olur
Uşşak-ı dil-figâra ecel mihribân olur.
2.Çeşmin o kahramân-i gazabnâkdir senin
Kim hışımı zâil olsa dahî bîamân olur
3.Kim gördü böyle hindû-yi mest-i kemîn-güşâ
Kim bir hadengi âfet-i cân-ı cihân olur
4.Müjgânlarınla seyr eden ol ebrûvânı der
Birden bu denlü tîr nice derkemân olur
5.Gamzen suâle başlasa uşşâka her müjen
Gûyâ lisân-ı hâl ile bir tercemân olur
6.Gamzen görür itâb ile öldürdüğün bizi
Durmaz girişme dahi ana hem-zebân olur
7.Bu nâz ü bu nigâh-i tegâfül ki sen de var
Hızr olsa âşıkın sebeb-i terk-i cân olur
8.Sen böyle nâz ü şive satınca gedalara
Narh-ı metâ-ı der ü belâ rayegân olur
9.Yeksân ise yanında seven sevmeyen seni
Hûbâna bu muameleden çok ziyân olur
10.Râzî değilse ger buna nâmûs-ı dilberi
Uşşâka derse böyle ihânet yamân olur
11.Her nâmahalle ruhsat-i nezzâre ya neden
Bir gün demez misin ki mahallinde kân olur
12.Dil bu havâ ile kafes-i teng-i sinede
Manend-i mürg-i bâl-i şikeste-tapân olur
13.Kim gülşen-i ruhunda vere nağmeye karâr
Tâ ol zamân ki bağ-ı cihân pür hazân olur.
14.Fikr eyleyince dâm-ı girih-gîr-i zülfünü
Bir hâlet elverir ki kafes gülsitân olur
15.Zülfün mü yâ gezende siyeh mâr-i hambeham
Kim pâsbân-ı genc-i nihân-ı miyân olur
16.Yahut hümâ şikâr edici şâhbâzdır
Dâim havâ-yi sayd ile bîâşiyân olur
17.Gâhi ki halka halka durur pîç ü tâb ile
Tuğra-yı hükm-i padişeh-i hüsn ân olur
18.Gâhi ki deste deste yatar yerde gûyiyâ
Çârûb-ı âsitân-ı memâlik-i sitân olur
19.Ol safder-i yegâne ki tâb-ı mehâbeti
Cevşen-güdâz-ı Tehmeten ü Kahramân olur
20.Ol dâver-i zemâne ki âb-ı adâleti
Gülbün tırâz-ı gülşen-i emn ü emân olur
21.Paşa-yı bî-karîne-i âlem ki âleme
İhsânı bî-nihâyet ü bî-imtihân olur
22.Düstûr-ı kâmkâr ki yekrûze bahşişi
Dahl-i hezâr sâle-i deryâ vü kân olur
23.Maksûd-ı kâinât u Murâd-ı cihâniyân
Kim âsitân-ı kıble-geh-i ins ü cân olur
24.Şem’-i cihân-serây-i vezâret ki şu’lesi
Meş’âl-fürûz-ı encümen-i hüsrevân olur
25.Mâh-ı felek-serîr-i saâdet ki pertevi
Nûr-ı çerâğ-ı baht-ı şeh-i ahterân olur
26.Rey’i münîri kim felek-i fehm ü dânişe
Bir mihr-i zerreperver-i arş-âsümân olur
27.Ger zerre denlü nûru ziyâ verse âleme
Hurşîd zerre gibi nazardan nihân olur
28.Bâd-ı sabâ ki bûy-ı gül ü yasemen için
Cerrâr-ı bînevâ-yı reh-i bûstân olur
29.Bir şemmesini bulsa eğer bûy-ı hûlkunun
Attâr-ı çârsû-yı zemîn ü zemân olur
30.Adli ki bir diyâr-i pür-âşûbe hükm ede
Düzd ü harâmi bedreka-i kârbân olur
…………………………………….
59. Kim vasf ederse zât-ı şerîfin benim gibi
Rûh-ı kelâmı kâleb-i mazmuna cân olur
60.Hakkâ benim o nâdire-perver ki her sözüm
Bir tuhfe gibi elden ele armağân olur
61.Tab’ım ki yâd-ı cezbe-i medhinle dem-be-dem
Bir bahr-i pür-hurûş-ı leâlî-feşân olur
62.Her gevher- nefis ki andan zuhur eder
Ârâyiş-i hazâin-i kevn ü mekân olur
63.Kim cem’ ederse gevher-i mazmun-ı hâsımı
Cem’iyyet-i cevâhir ile kâmrân olur
64.Tab’ımla kimse bahs edemez kahramân gibi
Endişe aleminde cihân pehlivân olur
65.Tutdu cihânı debdebe-i kûs-ı şöhretim
İşitmez anı gûşu hasudun girân olur
66.Hâsid benimle da’vi-i nazm eylese n’ola
Zu’münce har sühân-ver-i Îsî-beyân olur
67.Gör i’tikâd-i fâsidin etmez bu fikri kim
Rûbeh nice mukâbil-i şîr-i jeyân olur
68.Bir düzd-i nâbekâr-ı meanî-tırâş iken
Yârân sözüyle şair olur nüktedân olur
69.Hasm ittihâz edinmek o terzîk-gûyû ben
Nâmûs-ı şâirriyetime kesr-i şân olur
70.Anda liyâkat olsa ki ben laf urup desem
Gelsin benimle var ise bir imtihân olur
71.Nef’i duâya başla ko da’vâyı kim duâ
Nazm âhirinde âdet-i nazm-âverân olur
72.Tâ kim fürûğ-i câm-ı zer-endûd-ı âfitâb
Revnak-fürûz-i bezm-geh-i hâverân olur
73.Dönsün felekde sâgar-ı ikbâli gün gibi
Tâ ana dek ki âhir-i bezm-i cihân olur
Nefi Hayatı Edebi Kişiliği Eserleri
Nefi Seçkin Şiirleri Gazel ve Kasideleri
Nefi Divanı ve Seçilmiş Şiirleri
Nefi’yi idama götürmesi muhtemel şiiri
