Gam-ı yâr ile yârân ol dil ü cân ile tenden geç
Şehîd-i tîg-i ‘ışk-ı pâk olup fikr-i kefenden geç
N’idersin tâlib-i deryâ-yı vasl-ı yâr olup her dem
Yeter lü'lû-i eşk-i ter dilâ dürr-i ‘adenden geç
Mahabbet gösterüp ahbâb eger cevr eylese a‘dâ
Mukayyed olma gel ey dil sevenden sevmeyenden geç
Didüm tîr-i cefâ zahmı nigârâ cânuma geçdi
Didi nâz ile ol ebrû-kemânum gel geçenden geç
Hat-ı nev gelse zeyn itse didüm ruhsâr-ı cânânı
İşidüp didi bir ‘ârif yüri seyr-i çemenden geç
Yeter nûş itdüñ ey dil zehr-i cevrin ol cefâ-hûnuñ
Hüseynî-meşreb olduñ çünki sen hubb-ı hasenden geç
Didüm cânâ seni çok ‘âlem-i ervâhdan sevdüm
Didi meydân-ı ‘ışka gelmedi bir kimse senden geç
Süleymân-ı zamânsın sen benüm devletli sultânum
Senüñ yanuñda yaraşmaz rakîb-Ehrimen’den geç
Nedür bu nâle ey bülbül cefâ-yı hâra döymezseñ
Mahabbet gülşeninde gonce-i gül-pîrehenden geç
Visâl-i yâr ise maksûd eger ‘âlemde ey Ravzî
Hicâb-ı vuslat olmışdur saña kayd-ı bedenden geç
Fenâ dünyâda menzilgâh-ı maksûda irem dirseñ
Kurılmış cûy-ı ‘ömr-i bî-bekâya cisr-i tenden geç (153. Gazel)
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
