[mefâ’îlün mefâ’îlün mefâ’îlün mefâ’îlün]
1 Gam-ı mihrâb-ı ebrûn ile kıblem kâmetüm hamdur
Lebüŋ şevkiyle yaşum Ka’be hakkı ‘ayn-ı Zemzemdür
2 Cihân-ârâ işitdük ‘ışk-ı dil-ber cismi pâk eyler
Bu cevher kîmyâ-yı devlete ekber [ü] a’zamdur
3 Nazîrüŋ yok güneş yüzliler içre ey hilâl-ebrû
Miyânuŋ kılca fark olmaz dehânuŋ zerreden kemdür
4 Bütün dünyâ deger görmek yüzini yârumuŋ gerçi
Cihânda vaslına bir kerre irmek iki ‘âlemdür
5 ‘Aceb mi çeşm-i insâna görinmezse nihân ol şeh
Perîdür ol melek yüzli dilâ sanma ki âdemdür
6 Ma’ânî murgını sayd eyledüŋ şeh-bâz-ı fikretle
Anuŋçün Rahmiyâ şi’rüŋ cihân içre müsellemdür
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
