269.
. . - . - / . - - / . . - . - / . - -
1.Gam-ı ‘aşkuñ ile gamzeñ dile çok cefâlar itdi
Bize neylediyse cânâ yine âşinâlar itdi
2.Dahi meclis evvelinde buradan çekildi Cemşîd
Yine câm-ı Cem safâsın güzelüm gedâlar itdi
3.Nice bende olmıyam ben ki o şeh geçüp giderken
Göz ucıyla çeşm-i pür-fen bize merhabâlar itdi
4.Görüp çeşm-i bî-gerânum güler ol şeh-i cihânum
Ney-i nâle vü figânum işidüp safâlar itdi
5.Göre hîç yanaşdurur mı kulını o şâh-ı hûbân
Dil-i zâr içün ‘Atâyî şu kadar cefâlar itdi
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
