[mefâ’ilün fe’ilâtün mefâ’ilün fe’ilün]
1 Figân ider yine bülbül bahârı görmişdür
Benüm gibi o da bir gül-’izârı görmişdür
2 Benefşe pür-figen olmış durur perîşân-hâl
Meger ki sünbül-i zülf-i nigârı görmişdür
3 Benem o sadr-nişîn-i mahabbet-i cânân
İçine girmedi Mansûr dârı görmişdür
4 Hezâr murg uçurmış durur yuvasından
Figân ki ol gül-i ra’nâ hezârı görmişdür
5 Şu deŋlü cenneti vasf itdi ‘âlim-i vâ’iz
Meger ki ravza-i kûy-ı nigârı görmişdür
6 Vücûd-ı ‘âleme Rahmî ‘adem dir ise nola
Umûr-ı dünyede çok i’tibârı görmişdür
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
