Ezelde levha kalem hüsn yazusın yazalı (624/1)
Bu resme yazmadı bir nakş sun-ı lem-yezeli
Anuñ cemâlı müzeyyen idüp-durur ebedî (624/2)
Anuñ kemâlı müretteb kılup-durur ezelî
Aña bedel kimi diyem ki cân bigi hergiz (624/3)
Vücûda gelmedi gelmeyiser dahı bedeli
Yañagı rengine görmedi rengi sun-ı ezel (624/4)
Nigâr hânesini sıbgatu’llahuñ yazalı
Gözüñ kemân-keş tîr âfitâba eyledi râst (624/5)
Bu fitne n’ireden ögrendi ola bu ameli
Ne râzlar aça cândan ne ukdeler kıla hal (624/6)
Eger saçuñ girihine ire sabânuñ eli
İki cihânda murâd Ahmedîye sensin bes (624/7)
Dahı ne mülki var anuñ ne mâl u ne emeli
Sabûh sâzına sûz-ıla eyleye âheng (624/8) c
Utârid ohısa zühre katında bu gazeli
İy gün ü aydan arı vü iy kamu aybdan berî (625/1)
Sûret-i cânı sorana yüzüñ açup di kim beri
Zulmeti zikr idene kıl arza saçuñ sevâdını (625/2)
Âb-ı Hayâtı añana di ki uş agzumuñ yarı
Diyene nice dutılur ukde-i re’sde kamer (625/3)
Saçlaruñı girih girih çöz dahı yüzüñi büri
Gül varakında şeb-nemüñ lutfını nice diseler (625/4) c
Arz id alara dür bigi lal yüzüñdeki deri
Münkire karşu bir nefes ko lebüñi lebüme kim (625/5)
Rûşen ola katında_anuñ kim nice_olur ölü diri
Kimse dir-ise âşıkuñ yaşı gerek nice aha (625/6)
Gösder aña gözümdeki kulzüm ü bahr-ı ahdarı
İtse azîz ayaguña cânını Ahmedî fidî (625/7)
Sen anı ayb itme kim oldur elindeki varı
Dr. Yaşar AKDOĞAN, Ahmedî DÎVÂN https://ekitap.kulturturizm.gov.tr/Eklenti/10591,
