51
Fâ‘ilâtün fâ‘ilâtün fâ‘ilâtün fâ‘ilün
1 Ey Habîb-i Hazret-i Hallâk-ı ‘âlem el-meded
Ve'y hekîm-i ehl-i derd-i sınf-ı âdem el-meded
2 Râh-ı ‘âşkda bulmayup temkîn henüz şeydâ-misâl
Bî-sebât nefis ile âşüfte-hâlem el-meded
3 Aldı sayyâd-ı hevâ her-sû tarîkı neyleyim
Güm-şüde bu tîhde âhû-misâlem el-meded
4 Hâk-i pâyiñ mikhalinden nemleyüp bir mîl giçür
Çeşm-i nâ-bînâ açılsun bî-mecâlem el-meded
5 Viremedim bir netîce râh-ı ‘aşk mesdûd olup
‘Akl-ı cüz’îye uyup bend-i ‘ikâlem el-meded
6 Büt huzûrında ne hod-bîn gâfilem ki bilmezem
Sûretiñ zenbiyle her dem per ü bâlem el-meded
113
7 Sancılup kaldı şehâ dilde havâdis okları
Merhem it lutf it çıkar işkeste bâlem el-meded
8 Bu kafesde âdemiyyet hâletin derk itmeyüp
Hâlden ‘ârî tûtî-veş bî-hûde kâlem el-meded
9 Varlıgıla gîce gündüz eylesem tâ‘at hebâ
Mâcerâ-yı ders-i ‘aşkdan bî-me’âlem el-meded
10 Resm-i ‘âdî ‘ârızî itsem ‘ibâdet zevk yok
Aslı bilmem fer‘ ile fâsid hayâlem el-meded
11 Pîr-i San‘ânı halâs itdiñ o deñlü vartadan
Küfr-i hestîden rehâ kıl lâ-salâhem el-meded
12 Dest-gîr ol tut elimi yâ Şefî‘ü'l-müznibîn
Cürm-i hestî hacletinden güng ü lâlem el-meded
13 Vir güşâyiş dest-i ma‘nâ ile Sıdkî bendeñe
Cünha-i bisyâr ile beste-hayâlem el-meded
Dr. Abdullah EREN, MEHMED SIDKÎ DÎVÂNI, https://ekitap.kulturturizm.gov.tr/Eklenti/10625,mehmed-sidki-divanipdf.pdf?0
