599
Mefâ‘îlün/ Mefâ‘îlün/ Mefâ‘îlün/ Mefâ‘îlün
Bulınmaz baña eglence hayâl-i yârdan gayrı
Enîs ü mûnisüm yokdur gam-ı dildârdan gayrı
Temâşâgâhuñ olmışdur senüñ bu gülşen-i ‘âlem
Ne gördüñ söyle ey bülbül cefâ-yı hârdan gayrı
Ziyâfet eyle didüm hân-ı hüsnüñle cihân halkın
Ayıtdı aña kim kâdir olur hünkârdan gayrı
Gamuñ dâru’ş-şifâsında firâkuñ şerbetin içüp
Tabîbüm kim helâk oldı dil-i bîmârdan gayrı
Ferâgum var benüm Ravzî-sıfat kâlâ-yı ‘âlemden
Cihânda ber-murâd yok visâl-i yârdan gayrı
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
