125*
 
FeǾilātün/FeǾilātün/FeǾilātün/FeǾilün
 
1. Elif ol ad ile meşhūr-ı cihān Türk-i süvār
Hicr ile niçe ķılur baňa bu giň dünyeyi ŧar
2. Bī belādur başuma ķadd-i bülendüň bilürem
İsterem Ĥaķdan o devlet ķıla başumda ķarār
3. Tī temāşāsı cemāline ki sen Türküň irem
Terk-i cān itmez olursam depele zār u nizār
4. Ŝī ŝevāb ister iseň dünyede ey ŝānī Ĥıżır
Teşne-dil ķulları küşt eyle ya Ǿarż eyle dīdār
5. Cīm cemǾ olsa cihān cümle cemālüň śıfatın
Śayıp irgürmeyeler āħire tā-rūz-ı şumār
6. Ĥī ĥelāl itdi ĥarāmīlıġ ile ķanumuzı
Dün gice ġamze-i bed-kīşine bir çeşm-i ħumār
7. Ħī ħam-ı zülfüňe ŧolaşalı dil ħurrem olur
Delüdür nestene bilmez ki nedür n’oldı ya kār
8. Dāl demdür ki diyem derd-i derūndan dile de
Ki bile derd-i derūnda nedür ya ħo ne var
9. Źāl zevķ-i źeķan-ı yāri göňül źikr idicek
Ķalmışam anda daħı ünlemişem ben baňa yār
10. Rī revā mı k’aňulmasa reviş-i ķāmetüňüň
Kend’özini getüre ara yire serv ü çenār
11. Zī zer-i ħāliś iken çihre-i zerdüm ne Ǿaceb
Bir nažar ķılmaduġı kūşe-i çeşm ile nigār
12. Sīn sünbül śaçuňuň silsilesin terk idenüň
Rūz-ı rūşen gözine olsa Ǿaceb mi şeb-i tār
13. Şīn şükrüm buňa sen şöhre-i āfāķı görüp
Ķalmadı āyīne-i dilde daħı hīc ġubār
14. Śād śubĥ-ı ruħuňa ķarşu śabūĥ itmek içün
Sāķī-i ġonca-dehen śunsa n’ola cām-ı Ǿuķār
15. Żād żaǾf ile vücūdum çöpe dönse ne Ǿaceb
Çekicek bār-ı nigārı yine göňlüm her bār
16. Ŧī ŧolaşma didügümce ŧolaşur zülfüňe dil
Müşkil oldı işi ġāyetde olup key düşvār
17. Žī źuhūra geleli źıll-i źalīli ķadüňüň
Ħoş geçer bende vü āzād u şeh ü mīr ü kibār
18. ǾAyn Ǿizzet baňa Ǿālemde itüm didügidür
Ĥāşe lillāh kim ide ĥürmet olıcaķ kişi Ǿār
19. Ġayn ġurbetde beni göz yaşı ġarķ eylemeden
Yetişem mi Ǿacabā vuślatuňa āħir-i kār
20. Fī fer umarsa yüzüňden ne Ǿaceb mihr-i felek
Ķıldı Ĥaķ nūrını gün gibi cemālüň ižhār
21. Ķāf ķurb-ı ser-i kūyuňda ķarār itdise dil
İrgürür devlet ü iķbāle anı ķurb-ı civār
22. Kāf kül ķılsa beni gül yüzüňüň şevķı n’ola
Odlara niçeleri yaķdı yaķar daħı bu yār
23. Lām laǾl-i lebüňe ölmeden irem mi Ǿaceb
Gerçi bir źerrece irmege aňa yoķ miķdār
24. Mīm merdümlük idüp merdüm-i çeşmüm dün ü gün
Dür ü laǾl ü güher ider yoluňa şöyle niŝār
25. Nūn ney nāle-i dil-sūz ile her dem bunı dir
Ŧurmaň içüň kim irişdi yine hengām-ı bahār
26. Vāv vāh kim iremez vuślatuňa daħı Münīr
Gerçi çoķ vaǾde-i ħām eyledüň itdüň iķrār
27. Hī hevā-yı gül-i ruħsāruňı çün ķıldı heves
Murġ-ı dil her dem iderse yiridür nāle-hezār
28. Lām elif lāle gibi lāl olursam ne Ǿaceb
Şöyle yandum ki çıķar her yaňadan daħı şerār
29. Yī yürek yaraları şerĥini yazmaġa gözüm
Ķıl ķalemle yüzüm üzre dürişür leyl ü nehār
 
Ersen Ersoy, Münirî Dîvânı, : T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2017 ISBN: 978-975-17-3803-5 Ana Yayın Numarası: 3557 Kültür Eserleri Dizisi-560