[fâ’ilâtün fâ’ilâtün fâ’ilâtün fâ’ilün]
1 Ehl-i dil dünyâ deger dirse nola câm-ı şarâb
K’anuŋ üzre kubbe-i eflâke beŋzer her habâb
2 Şöyle mestem ger ölüp hâkümden olursa sebû
Âb içen andan ola tâ haşre dek mest ü harâb
3 Saldı pertev mâh-ı ruhsâruŋ şikâf-ı sîneme
Hânemüŋ san revzeninden düşdi ‘aks-i âftâb
4 Çekdigüm gam fâş ola ‘âlemlere nâ-geh diyü
Eşk-i çeşmüm çekdi rûy-ı zerdüme gül-gûn nikâb
5 Kâr u bâruŋ bâd-ı gam dirseŋ ki ber-bâd itmeye
Bâdeden başuŋ götürme Rahmiyâ hem-çün habâb
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
