578
Mefâ‘îlün/ Mefâ‘îlün/ Mefâ‘îlün/ Mefâ‘îlün
Letâfet bûstânınuñ bugün ey serv-i bâlâsı
Cihânı bende kıldı kendüye ol kadd-i ‘Abbâs’ı
Safâ-yı la‘lüñ ile Merve hakıdur saña zemzem
Göñüller Ka‘be’sinüñ Mustafâ’sı dil temennâsı
Şehîd-i Kerbelâ hakı bugün meydân-ı hüsn içre
Cihâna cezbe salmışdur Hüseyn’üñ rûy-ı zîbâsı
İder bir kerre yâd itseñ dimâg-ı cânı pür-lezzet
O nahl-ı kâmetüñ irişdi ey dil la‘li hurmâsı
Dügün bayramdur mâtem degüldür ey kemân-ebrû
Hedef kılsa beni tîr-i cefâya kaşlaruñ yâsı
Göñül bir yirde ârâm eylemez âvâre olmışdur
Göge agmış meger anuñ Mesîhâ gibi ‘Îsâ’sı
Geçinürdi gınâ-yı kalbe mâlik âsitânuñda
Bihamdillâh rakîbüñ zâhir oldı şimdi iflâsı
Hızır Bâli’yle dest-bûs iderken gel beni seyr it
Eger görmek dilerseñ bir arada Hızr u İlyâs’ı
Tabîbüm gel nazar kıl Ravzi-i dil-hasteye tâ kim
Mahabbet resmin i‘lâm eyleye Mahmûd’a Ayas’ı
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
