Mefâ`îlün mefâ`îlün mefâ`îlün mefâ`îlün
1 Dilün bir kez sınuk mir'âtine bakdı yüzin dürdi
Tecellâ-yı cemâlin var ise dil-dâr çok gördi
2 Abîr-i hâk-i pâyın sakınur bir katre yaş dökmez
O âşık kim ayagun tozına bir kez yüzin sürdi
3 Kerem kıl ben gubârı ey sabâ irgür der-i yâre
Di kim bî-çâreyi hicrân gamı bir hâle irgürdi
4 Nişân-ı seng-i cevr itse rakîbün kellesin derdüm
Güzel fehm eyledi maksûdımı çak başına urdı
5 Hele rûz-ı su'âl olsun da görsün yâr Yahyâ'yı
Ne bir dem yüzine bakdı ne bir kez hâtırın sordı
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
