45
(Fâilâtün Fâilâtün Fâilâtün Fâilün)
1 Dilde yek dâg-ı hevesle ışk-ı yâr olmaz bedîd
Bir çiçekle mevsim-i tâb-ı bahâr olmaz bedîd
2 Râzdân ister Kelîmâsâ zebân-ı şuleden
Yohsa her nûr-âşinâ-yı Tûr’a nâr olmaz bedîd
3 Cevher-i dil kat-ı peyvend-i alâyıkdan çıkar
Berg ü şâhın kesmeden mevc-i çenâr olmaz bedîd
4 İnkişâfa bakma idbârın nihâyet bulmadan
Ermese pâyâna şeb nûr-ı nehâr olmaz bedîd
5 Eyler âsârı şikeste âlemi yek lahzada
Dilde Haşmet gerçi nakş-ı inkisâr olmaz bedîd
Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ
