-340-
Mefâ`îlün Mefâ`îlün Mefâ`îlün Mefâ`îlün
 
1 Dilâ sen `aşka düşdüñ derd-i bî-dermânı bilmezsin
 Visâle tâlib olduñ mihnet-i hicrânı bilmezsin
2 Dilâ gâfil gezersin sen bu der-bend-i mihnetde
 Meger kanlar döken ol gamze-i fettânı bilmezsin
3 Kanı idrâküñ ey dil yohsa kalduñ mı tedârikden
 Usanduñ tatlu cânuñdan henüz cânânı bilmezsin
4 Bilürsin göz ucıyla iltifâtuñ bir kez ey hûnî
 Niçün yıllarca derdüñ çekdügüm devrânı bilmezsin
5 Sözi makbûlüñ ammâ ragbet itmezsin Ziyâ’îye
 Güher kadrin bilürsin ma`den-i `irfânı bilmezsin
 
 
Dr. Müberra GÜRGENDERELİ, MOSTARLI HASAN ZİYÂ’Î DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3195 KÜLTÜR ESERLERİ