Mefâ`îlün mefâ`îlün mefâ`îlün mefâ`îlün
1 Dilâ bâr-ı visâle dest-i himmetle irilmez mi
Nesîm-i lutf esmez mi o nahl-i nâz egilmez mi
2 Tebessüm itdügince goncenün meftûn olur bülbül
Derûnı kat kat oldugın dahı bî-çâre bilmez mi
3 Gönül senden kesilmez sen cefâdan vaz gelmezsin
Yine incinme dirsin cân u dilden incinilmez mi
4 Gül-i bâgun elinde dest-mâli nola al olsa
Hezârân bülbülün her dem gözi yaşı silinmez mi
5 Kayurmaz seyl-i gam taşsun gerekse başdan aşsun
Kümeyt-i bâde-i gül-gûn ile Yahyâ geçilmez mi
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
