Mefâ`îlün mefâ`îlün mefâ`îlün mefâ`îlün
1 Dil-i şeydâ nola meyl eylemezse vasl-ı cânâne
Ne zahmetler çeküpdür alışınca derd-i hicrâne
2 Nihâl-i bânı kadd-i yâre benzetmişdüm incinmiş
Anı nice yetişdirmişler ol şâh-ı cihânbâne
3 Niçün câm-ı musaffâyı getürmez sâkî-i meclis
Bizümle ahd ü peymân eyledi turmaz mı peymâne
4 Gice pervânelerle bezmi germ-â-germ idi şem`ün
Seher bakdum ne şem-i meclis-ârâ var ne pervâne
5 Bu meclisden hemân `uzlet-güzîn olmak gerek Yahyâ
Tahammül eylemez `âkil olan evzâ-ı mestâne
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
