[fe’ilâtün fe’ilâtün fe’ilâtün fe’ilün]
 
1 Dil diler tîgüŋi ger olsa mahabbet gâlib
Meyl ider âba kime olsa harâret gâlib
 
2 Mâsivâ mahv olur dilde mahabbet ide cûş
Olımaz mevc urıcak bahre küdûret gâlib
 
3 ‘Akl u fikrüm tagılur veh ne temennâ-yı visâl
Göricek yâri olur cümleye hayret gâlib
 
4 Bülbülüŋ kanı meger tutdı gül-i ra’nâyı
Nazar it ‘ârız-ı zîbâsına humret gâlib
 
5 Kûyuŋ aŋup nola kan aglar isem gülşende
Gurbete düşse olur âdeme rikkat gâlib
 
6 Rahmiye yâr visâlin nola ihsân itse
Lâyık oldur ki ola beglere himmet gâlib
 
 
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,