253.
- - . / . - - . / . - - . / . - -
1.Dil-dâre göñül dilde mekân eyleyemez mi
Cânâneyi cân içre nihân eyleyemez mi
2.‘Uşşâka ne hâ’il olur ey husrev-i hûbân
Bir âh ile biñ kûhı revân eyleyemez mi
3.Tutmış mıdur esrâr-ı gülû-gîr-i muhabbet
‘Âşık ser-i kûyında figân eyleyemez mi
4.Bî-tâkat iderse ne kadar hüsn-i dil-ârâ
Pîrân-ı gamı ‘aşkı civân eyleyemez mi
5.Sad-merhale dûr olsa ‘Atâyî der-i dil-dâr
Dil himmet ile tayy-ı mekân eyleyemez mi
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
