Fâ`ilâtün fâ`ilâtün fâ`ilâtün fâ`ilün
 
 1 Dîdeden su sepdigüm bu sîne-i sûzânuma
 Korkarın te'sîr ide sûz-ı dilüm cânânuma
 2 Kurs-ı dâgum tîg-i hûn-rîz ile eyler çâk çâk
 Turmaz etmek tograr o bî-rahm dil-ber kanuma
 
 3 Gayrdan dil hânesin dil-dâr içün kıldum tehî
 Yer ider kalbümde ol dil-ber gelürse yanuma
 4 Seyre gitse her kaçan satmak diler ben bendesin
 Kul gerekmez mi `aceb ol hüsrev-i hûbânuma
 5 Söyle elbette kime `âşıksın ey Yahyâ disen
 Bin hicâb ile cevâbını disem sultânuma
 
 
Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147