208.
- . - - / - . - - / - . - - / - . -
1.Devr-i güldür mevsim-i geşt ü güzâr oldı yine
Cûy-veş dîvâne göñlüm bî-karâr oldı yine
2.Yelken açdı şâhlar yaprag açan eyyâmıdur
Yürisin zevrak muvâfık rûzgâr oldı yine
3.Sünbülüñ zülfinde gördi çeşm-i bülbül nakşını
Bülbülüñ çeşmine ‘âlem teng ü târ oldı yine
4.Zîr-i dâmânında pinhân idi kühsâruñ meger
Bezm-i gülde şem‘-i lâle şu‘le-dâr oldı yine
5.İtdi âfâkı mu‘attar sâye sanmañ her taraf
Gülşene ebr-i bahârî müşg-bâr oldı yine
6.Gonça evrâkı misâl-i hâtır-ı erbâb-ı dil
Cem‘ olup bir iki günlük târ u mâr oldı yine
7.Dilde bir sevdâ zuhûr itdi ‘Atâyî lâle-veş
Eski dâgum tâzelendi nev-bahâr oldı yine
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
