[mefâ’îlün mefâ’îlün mefâ’îlün mefâ’îlün]
1 Derûnumda karâr itdi hayâl-i zülf-i dil-berler
Tutupdur gûyiyâ vîrânumı bir nice ejderler
2 Sabâ ruhsâruŋ üstinde perîşân kılsa zülfüŋi
Sanasın niçe miskînler durur sîm üzre ditrerler
3 Helâk eylerse ey hûnî dil-i sad-pâremi gamzeŋ
Mezârumdan çıka sûsen yirine kanlu hançerler
4 Nigâruŋ zülfi ebrûsıyla ey dil muttasıl seyr it
Kulagına egilüp fitneler ta’lîm eylerler
5 Kulag ursa nola ol sîm-ten eş’âruŋa Rahmî
Yaraşur gûş-ı şehde dâyimâ zîrâ ki gevherler
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,
