Feilâtün feilâtün feilâtün feilün
Derdin ey cân tabîbi bana dermân olsun
Vereyim varımı tek mürde dile cân olsun
Aynımın illetine gayrı devâyı n’iderim
Hâk-i râhın gözüme kuhl-i Sıfâhân olsun
Sulasam kâse-i çeşmimle n’ola yollarını
Garazum bu ki yolun dürr ile mercân olsun
Sürme bîgâne diye bâb-ı keremden şâhım
Kapına geldi bu miskîni ko mihmân olsun
Âsitânında gedâlar ki olur şâh-ı cihân
Bu gedâna dahi lutf eyle ki derbân olsun
Iyd-ı vuslat haberin bendeye her kim ki vere
Mürdeye cân verelim sıdk ile kurbân olsun
Dâğ-ı mihrim ki muhabbette nişân etmiştir
Sînem üzre çekeyim ki ana unvân olsun
Beni tek kes harem-i kûyuna hergiz varamaz
Beni cezb eyle keremden yolum âsân olsun
Âsitânında senin zerre değildir Şemsî
İltifât eyle şehâ zerreye tâbân olsun
Şemseddin Sîvâsî Divanı • 113 Recep Toparlı
