Der-Sitâyiş-i İbrâhîm Pâşâ
1. Bi-hamdillah yine feyz-i safâ şâmil cihân üzre
Cihan âsâr-ı hükm-i sulh ile emn ü amân üzre
2. Zamân-ı rezm geçdi şimdi vakt-i bezmdir söylen
Çemen nakş eylesin nakkâşlar püşt-i kemân üzre
3. Dem-i nev-bâve-çînî-i tarabdır geçdi vakt-i rezm
Murabba‘ şakk urulsun ba‘d-ezin nevk-i sinân üzre
4. Bu ol demdir ki bâlîn-i siperden penbeyi sâkî
Çıkarup vaz‘ ede ser-şîşe-i sahbâ-keşân üzre
5. Bu ol demdir ki esbân-ı neberdin perçemin mutrıb
Koparup bend ede destindeki çûb-ı kemân üzre
6. Olup necm-i emânî munsarıf nahs-ı mukâbilden
Yine pertev-feşân oldu zemîn ü âsmân üzre
7. Bi-hamdillah yine nûr-ı safâdan muzmahil oldu
Zalâm-efşân olan ebr-i kesâfet ins ü cân üzre
8. Edüp bayrak ferâz-ı nîzede pîçîde şehbâlin
Güşâd etdi perin kumrî ser-i serv-i çemân üzre
9. Seher gördüm hezâr-ı zârı lebrîz-i neşât olmuş
Gülün yâd eyleyüp feryâd ederdi âşiyan üzre
10. Bu şevke ben de bir tâze gazel tarh edeyim bâri
Bu gün seyr etdiğim ol nâz-perver nev-cüvân üzre
11. Gören pîç ü ham-ı gîsû-yı zerdin ebruvân üzre
Sanır zer-hal ile zencîredir püşt-i kemân üzre
12. O la‘l-i leb o gabgab sende kim vardır âdil olmaz
Felek Rûmun kirâsın koysa sîb-i Isfahân üzre
41
13. Hudâ güyâ ki cism-i nâzükün etmiş senin îcâd
Katıp bûy-ı gülü reng-i şarâb-ı erguvân üzre
14. Bakıp bir bâğa bir de ol ruh-ı zîbâya reşkinden
Gülün her berki bir hâl oldu çeşm-i bâğbân üzre
15. Neden tâ böyle dilkeşdir o gîsû bilmezem yohsa
Meges-ranlık mı eyler bezm-i sadr-ı kâm-rân üzre
16. Cihan-sadr-ı mu‘allâ-kadr kim bezm-i celâlinde
Döner gûy-ı felek fevvâre-veş şâd-ı revân üzre
17. Tırâz-ı mesned-i izz ü şeref kim bezm-i hâsında
Gezer hayl-i melek zenbûr-veş üşkûfedân üzre
18. Nigâh-bân-ı cihan kim istese mi‘mâr-ı tedbîri
Yapar bârûta mahzen şu‘leden âb-ı revân üzre
19. Vezîr-i muhterem Dâmâd İbrahîm Pâşâ kim
Felek derbânına yer verdi fark-ı farkadan üzre
20. Görelden ferr-i mencuk-ı otağın bî-karâr oldu
Dırahş-ı nûr hurşîd üzre hurşîd âsmân üzre
21. Süvâr olsa eger âlâya ta‘n eyler süreyyâya
Gümüşden pelleler şehperr-i fark-ı çavuşân üzre
22. Otursa kürsî-i divâna yer vermez Nerîmâna
Nigeh-dârân-ı dîvan-hâne seng-i nerdübân üzre
23. Ne mümkin pâyine sâyîde etmek cebhesin Rüstem
Bir iki mâh-ı nev nakş etmedikçe âstân üzre
24. Ne kâdir bakmağa fermân-ı âlî-şânına Bircis
Öpüp bir iki def‘a koymadıkça çeşm-i cân üzre
25. Zuhûr-ı mihrinin bir zerresin gösterdi âfâka
Hücûm etdikde feyz-i pertev-i hurşîd kân üzre
26. Hurûş-ı kîninin bir zerresin bildirdi dünyâya
Hücûm etdikde pûr-ı Zâl-i zer Mâzenderân üzre
27. Dilinde feyz-i cûd ol denlüdür kim olsa müstevlî
Eger bi'l-farz mühr-i keffi bir cüz'-i kırân üzre
42
28. Olunca ol kırânın devri âhir her gece tâ subh
Yağar şeb-nem yerine necm-i rahşan gülsitân üzre
29. Kemâl-i sür‘at-ı zihn öyledür kim kilki kasd etse
Edince zam felek bir ân-ı mevhûmı zamân üzre
30. Mi'âta darb edüp edvâr-ı çarhı hâsıl-ı darbın
Bilâ-kesrin kılar kısmet ru'ûs-ı ahterân üzre
31. Hudâvendâ hidîvâ âsafâ lutf-ı amîminden
Zemîn ahdında fahr eyler behişt-i câvidân üzre
32. Olur feyz-i cedîd-i rûha kâbil zîbak-ı maktûl
Nigâh-ı iltifâtın düşse bir âyînedân üzre
33. Eger bang-ı nefîr-ı satvetin inletse kûhsârı
Ve ger dâmân-ı lutfun sâye salsa gülsitân üzre
34. Künâmından eder ram-hûrde şîr-i şerzeyi rûbâh
Per-i şâhini eyler çetr bülbül âşiyân üzre
35. Hidîvâ sen ki etdin böyle hıdmet devlet ü dîne
Du‘â-yı devletin farz oldu el-hak ins ü cân üzre
36. Ki edüp hummâ-yı harb u fitne kable'n-nazc buhrânın
Karîb olmuşdu kim kasd eyleye cân-ı cihân üzre
37. Kılıp ahlâtı fasd-ı bî-mahal tahrîk olmuşdu
Halel târî mizâc-ı devlet-i İslâmiyân üzre
38. Bi-hamdillah hele sebbâbe-i Bokrat-tedbîrin
Aceb vaktinde dûş oldu o nabz-ı nâ-tüvân üzre
39. Aceb kânûn-ı makbûl üzre tertîb-i ilâc etdin
Aceb merhem kodun dillerdeki zahm-ı nihân üzre
40. Yine kıldı Hudâ zıll-ı zalîl-i re'fetin memdûd
Ser-i ikbâl-i yâr-ı husrev-i Cemşîd-şân üzre
41. Ki bir sen gibi düstûr-ı güzîne eyleyüp tevfîk
İnâyet eyledi Hak ol şeh-i vâlâ-mekân üzre
42. Tırâz-ı efser-i şâhiyle şermende eder mâhı
Nişân-ı hâk-i dergâhın cebîn-i husrevân üzre
43
43. Cenâb-ı Hak hemîşe hıfz ede zât-ı hümâyûnun
Cihan durdukça dursun mesned-i Osmâniyân üzre
44. Hidîvâ bir sözüm var onu dahı söyleyim bârî
Çü Hârût eylemişken ser-nigun kilki benân üzre
45. Ki oldu bir vesîku't-tarh gûyâ bu kasîdem kim
Eder isbât-ı fazlım Enverî-i nüktedân üzre
46. Ya sen de ey hidîv-i muhterem etmez misin isbât
Kemâl-i fazlını Şeh Sencer-i huld-âşiyân üzre
47. O etmiş Enverîye sâyesin memdûd düşmez mi
Senin de sâye-i lutfun Nedîm-i nükte-dân üzre
48. Zamân-ı devletinde ben hele bilmem sen insâf et
Sipihr olmak sezâ mı ehl-i tab‘a imtinân üzre
49. Sözüm gevher dizerken sîne-i havrâya lâyık mı
Ekem elmâs ben sînemde zahm-ı hun-çekân üzre
50. Senin gibi harîdâr-ı metâ‘-ı ma‘rifet varken
Kala kâlâ-yı nazmım dûş-ı dellâl-ı zebân üzre
51. Kalam bir böyle vakt-i sûdda ümmîd-i hâricle
Zer-i hâric gibi dâ'im tasavvurdan ziyân üzre
52. Nesîm-i re'fetin olsun meded-res kalmasın lutf et
Gül-i kâmım perîşan pençe-i bâd-ı hazân üzre
53. Yeter ey hâme verdin tâb u fer nazmınla âfâka
Du‘â gevherlerin diz gayri var ……………..
Prof.Dr. Muhsin Macit, NEDÎM DİVÂNI, KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3371
