Dağılmış âfitâb üzre nikâb-ı anber-efşânun
Muattar kılmış âfâkı meşâmı ol perîşânun
Hurûf-ı levh-i mahfûzun yazılmış âyet-i Hakdur
Anun şerhinde rûşendür beyânı ehl-i irfânun
Hatun ümmü’l-kitâbından açıldı ilm-i Rabbânî
Kelâmı tercümân itdi hadîs-i gevher-efşânun
Yüzündür sidre vü tûbâ cemâlün cennetü’l-me’vâ
Ser-i kûy-ı cenâbundur makâmı hûr u rızvânun
5. Götürdi perde zülfeynün cemâlün âfitâbından
Tükendi aklumun sabrı karârı kalmadı cânun
Hakîkî câm-ı la‘lünden irişdi bâde-i ışka
Kim anun çeşmesindendür havâssı âb-ı hayvânun
 
CİHÂNŞÂH HAKÎKÎ’
 
Muhsin Macit, Karakoyunlu Cihanşah'ın Türkçe Şiirleri, Kültür ve Turizm Bakanlığı Kütüphaneler ve Yayımlar Genel Müdürlüğü, Ankara 2017, ISBN: 978-975-17- 3631-4 Ana Yayın Numarası: 3368