Fâ`ilâtün fâ`ilâtün fâ`ilâtün fâ`ilün
1 Cûy-ı eşküm serv-kaddünçün ko aksun sû-be-sû
Bûstân-ı kûyun arayı tolansun kû-be-kû
2 Her kılı zencîr-i gam her târı bir mâr-ı elem
Böyledür ol zülf-i pür-ham dikkat itdüm mû-be-mû
3 Da`vi-i hüsn ü melâhat eylemiş dil-dâr ile
Lâzım oldı yâr ile mir'âtı itmek rû-be-rû
4 `Arız-ı rengînünün hergiz misâlin görmedüm
Pül gibi gözden geçürdüm suları hep cû-be-cû
5 Goncedür gülzâr-ı derd ü gamda Yahyâ'nun hemân
Renk-beste gönli tâze dâglar ile bû-be-bû
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
