173
Mef‘ûlü mefâ‘îlü mefâ‘îlü fe‘ûlün
1 Çün sendedür ol cân-ı cihân sen ne ararsın
Hâricde mi ya dilde nihân sen ne ararsın
2 Ol şûhı ne dem yoklar iseñ hânede hâzır
Yokdur aña hîç vakt ü zamân sen ne ararsın
3 Şâyeste iseñ gir içerü seyriñi eyle
Mübhem degil ebvâb-ı cinân sen ne ararsın
4 Seyr ister iseñ şîvesini çünki nigârıñ
Her cilvesi hûblarda ‘ayân sen ne ararsın
5 Sıdkî arama ‘âlem-i zâhirde hazer kıl
Bâtında hafî hasm-ı girân sen ne ararsın
Dr. Abdullah EREN, MEHMED SIDKÎ DÎVÂNI, https://ekitap.kulturturizm.gov.tr/Eklenti/10625,mehmed-sidki-divanipdf.pdf?0
