607
Fâ‘ilâtün/ Fâ‘ilâtün/ Fâ‘ilâtün/ Fâ‘ilün
Sâdıku’l-kavl ol hemîşe Hazret-i Kur‘ân gibi
Tâ sözüñ her sînede hıfz ideler îmân gibi
‘İlmüñ ile ‘âmil olursañ eger fermânuña
Cümle ‘âlem tâbi‘ olur mezheb-i Nu‘mân gibi
Eylemez meyl-i edânî merdüm-i ‘âlî nazar
Görinürse gam degül dünyâ baña zindân gibi
Ger olursa ey göñül Ya‘kûb-‘ismet hem-rehüñ
Mısr-ı câna şâh olursın Yûsuf-ı Ken‘ân gibi
Hû makâmında hüviyyetden nasîbüñ yog ise
Len-terânî işidürsin Mûsi-i ‘İmrân gibi
Mustafâ-sûret Muhammed-sîret olursañ eger
Bir nefesde ‘arş-ı Rahmân’a çıkarsın cân gibi
Âşinâ-yı bahr-ı zât olmışsın ey Ravzî yine
Her sıfâtuñ gavrına irmek saña âsân gibi
Kerbelâ-yı gamda kurmışsın otag-ı haşmeti
Kişver-i dilde Hüseyn-i muhteşem sultân gibi
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009
