Mefâ`îlün mefâ`îlün mefâ`îlün mefâ`îlün
1 Cülûs itdi serîr-i bâga gül irdi safâ devri
Be zâhid halka-i rindâna gel gitdi riyâ devri
2 Mey-i âl ile pür peymâne-i gül bezm-i gülşende
Safâlar sür gönül kim irdi câm-ı dil-güşâ devri
3 Sabâ tahrîk ile koydı semâ`a cümle ezhârı
Dahı âlemde mesmû` olmadı böyle hevâ devri
4 Olup gülzâr-ı dehri çeşme-i hûrşîd ile dâ`ir
Cihân bâgını ser-sebz itdi dolâb-ı semâ devri
5 Felek kutb-ı Murâdî üzre dönsün dâ'im ey Yahyâ
Ki gâyet hoş gelüpdür şâh-ı devrânun bana devri
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147
