Mefâîlün mefâîlün mefâîlün mefâîlün
1 Cihân bâğında âsâr-ı tarâvet kalmamış gitmiş
Gülü solmuş gülistânında ziynet kalmamış gitmiş
2 Bu kevnin rûzgâr etmiş çerâğ-ı revnakın itfâ
Misâl-i mürde rûyunda beşâşet kalmamış gitmiş
3 Ne sâkî var ne mey var gûyiyâ bu bezm-i âlemde
Usûl-i Cem bozulmuş ayş u işret kalmamış gitmiş
4 Hemân ankâ gibi bir nâmıdır devrân eden yoksa
Miyân-ı nâsda mihr ü muhabbet kalmamış gitmiş
5 Giriftârân-ı devr-i dehri me'yûs-ı devâ gördüm
Dirîgâ âşinâ-yı fenn-i hikmet kalmamış gitmiş
6 Dilâ kimden ümîd-i lutf edersin şimdi âlemde
Tükenmiş mâye-i feyz ü semâhat kalmamış gitmiş
7 Aceb eşrât-ı sâatden midir bilmem umûm üzre
Benî Âdemde insâf u mürüvvet kalmamış gitmiş
8 Vusûl-i matlaba bir vâsıta ister idim ammâ
Ne çâre öyle bir erbâb-ı himmet kalmamış gitmiş
9 Nedir bu inkırâz-ı ma'rifet âlemde Meşhûrî
Meğer sınf-ı hüner-mendâna rağbet kalmamış gitmiş
Yaşar AYDEMİR-Halil ÇELTİK, MEŞHURÎ DİVANI (Tenkitli Metin), T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3196 KÜLTÜR ESERLERİ, Ankara 2009
